Колку е штетен Чет ГПТ за децата и тинејџерите?

Во ерата кога децата и тинејџерите сè почесто ја користат вештачката интелигенција за учење, за решавање домашни задачи, но и за споделување лични проблеми, се отвора едно важно прашање: колку навистина се свесни за последиците? Додека за едни оваа технологија е корисна алатка што им заштедува време и им помага во образованието, за други може да стане извор на забуна, емоционална зависност, па дури и опасност.

Светот неодамна го потресе случајот на тинејџер кој си го одзеде животот, откако наводно преку разговор со вештачка интелигенција барал насоки за самоубиство, убедувајќи го системот дека сето тоа е дел од измислена приказна. Оваа трагедија отвори сериозни прашања за безбедноста, контролата и одговорноста во користењето на новите технологии.

Психолозите предупредуваат: младите сè почесто бараат разбирање и совет таму каде што нема човечка топлина, а вештачката интелигенција, колку и да е напредна, не може да ја замени емпатијата и вниманието на родител, пријател или професионалец.

Авторитетите кои им се на децата - родители или наставници, треба да ги насочат на штетните последици од вештачката интелигенција и за што може да ја користат.

Наставниците ќе одат на обуки за вештачка интелигенција, вели министерката за образование и тие ќе ги обучуваат учениците во училиштата за правилните начини како да ја користат.

Тинејџерот Адам Рејн од Калифорнија си го одзеде животот во април оваа година, по месеци разговори со ChatGPT. Семејството го тужи OpenAI и неговиот директор Сем Алтман, обвинувајќи ги дека ја пуштиле верзијата GPT-4o со сериозни безбедносни недостатоци.

По ова, компанијата најави нови заштитни мерки, родителски контроли и ажурирања за да спречи вакви трагедии во иднина.