Македонија
3. јуни 2016 - 14:47

Ќе се осветли паркот пред Општинската зграда во Велес

Пред зградата на Општина Велес денеска започнаа градежните работи за поставување осветлување во паркот, проект чија вредност е 200 илјади денари одвоени од локалниот буџет, информира на денешната прес-конференција градоначалникот Славчо Чадиев.
 
Проектот ќе се одвива во две фази, а според планот, во првата фаза ќе се постават осум светилки, а потоа уште шест.
 
- Градежните и работите на поставување на светилките треба да завршат за четири до пет дена, рече Чадиев.
 
Појасни дека поради веќе поставен систем за наводнување на тревата во паркот, работите внимателно се изведуваат, а ќе бидат поставени и клупи за граѓаните.
 
- Уредувањето на паркот е на барање на жителите од околните згради и останатите граѓани,а кои сакаат посебно во престојните летни денови да уживаат во прекрасниот парк и после затемнувањето по 20 часот.Затоа ние со овој проект тоа ќе им го овозможиме да престојуваат во паркот и во вечерните часови,потенцира Чадиев.
 
Тој меѓу другото информира дека некои од телевизките кабловски оператори  веќе започнале со  вкопување во земја на каблите низ велешките улици.