Кина и ЕУ мора да ги направат своите трговски и економски односи позаемни и избалансирани, нагласи Шарл Мишел во Пекинг

Високите претставници на Европската унија, кои се во посета на Пекинг, повикаа на намалување на трговските бариери за европските компании, јави ДПА.

Секој ден се разменуваат стоки во вредност од над 2 милијарди евра, но трговскиот дефицит на ЕУ со Кина изнесува речиси 400 милијарди евра, изјави претседателот на Европскиот совет Шарл Мишел за време на разговорите со кинеските лидери. Треба да се спроведат конкретни мерки за да се врати рамнотежата во овие односи, рече тој.

Претходно, кинескиот претседател Си Џинпинг рече дека верува оти Кина и ЕУ треба да бидат партнери, а не да се гледаат себеси како ривали. Тој очигледно алудираше на изјавите на високи политичари од ЕУ кои често ја опишуваат Кина како „партнер, конкурент и системски ривал“.

Урсула фон дер Лајен, претседател на Европската комисија, пред состанокот изјави дека европските премиери нема да толерираат нерамнотежа во трговските односи на долг рок. Фон дер Лајен како специфични проблеми на ЕУ ги посочи незадоволителниот пристап на европските компании до кинескиот пазар и повластениот третман на кинеските компании преку субвенции.

Во почетокот немаше информации за конкретни резултати од самитот. Фон дер Лајен подоцна напиша на платформата Х дека имало „добра и искрена размена“. „Се согласивме дека имаме заеднички интерес за врамнотежени трговски односи“, напиша таа.

Кина изрази надеж дека Европската унија ќе биде внимателна во воведувањето рестриктивни економски и трговски политики и користење на трговски лекови за да ги задржи отворените трговските и инвестициските пазари, соопштија државните кинески медиуми, цитирајќи ја изјавата на премиерот Ли Кијанг.

Ли, кој се состана со Шарл Мишел и Урсула фон дер Лајен, рече дека Кина се противи на широката политизација на економските и трговските прашања што ги крши основните принципи на пазарната економија. Кина е подготвена да работи со ЕУ за да се придржува до сеопфатно стратешко партнерство, додаде тој.