Кавадаречкиот Дедо Мраз хуманитарно подели 1.500 пакетчиња за деца

Кавадарчанецот Ѓорѓи Вареловски кој веќе 21 година по ред за новогодишните празници во својот двор украсен како од бајките, прима деца од Македонија и странство, деновиве хуманитарно подари 1.500 пакетчиња за најмладите.

-Голем број  деца и овојпат беа дел од магијата во, како што велат нивните родители, домот или работилницата на Дедо Мраз. Со сопствени можности, но благодарение и на поддршката од неколку кавадаречки компании и поединци, ја остварив мојата мисија за што повеќе детски насмевки, рече тој за МИА.

Вчера, Вареловски посети две социјално загрозени семејства во селата Дреново и Марена. Децата добија новогодишни пакетчиња, а родителите прехранбени производи и хигиенски средства.