Јапонска помош за Македонија и Србија за бегалците

Владата на Јапонија одлучила да издвои 3 милијарди јени (околу 2,7 милиони американски долари) како неповратна помош, преку УНХЦР, за мерки за заштита на бегалците во Македонија и Србија од зимски услови.

Одлуката, како што соопшти јапонската канцеларија за врски во Скопје, е донесена како одговор на апелот на УНХЦР за поддршка на планот за бегалската криза во Европа во зимски услови. Грантот опфаќа мерки за одржување на прифатните центри во Македонија и Србија, со грејна и друга опрема за зимски временски услови. 

Премиерот Шинзо Абе ја пренел одлуката за неповратната помош на Високиот комесар на ОН за бегалци, Антонио Гутереш, за време на нивната средба во Токио на 25 ноември 2015.

Ова е втора помош наменета за бегалците во Македонија и Србија, по 25 септември 2015 кога Владата на Јапонија одлучи да додели итна неповратна помош во висина од приближно  240 милиони јени (2 милиони американски долари) како одговор на масовниот прилив на бегалци и мигранти во Западен Балкан, преку УНХЦР, Меѓународна организација за миграција и Меѓународен црвен крст и црвена полумесечина, наменети за подобрување на условите во прифатните центри, психолошка поддршка, храна, лекови, како и зголемување на капацитетите за погранична контрола и регистрација на бегалците.