ОН ја прекинуваат помошта на Турција за северозападна Сирија поради несогласувања во Советот за безбедност

Советот за безбедност на ОН синоќа не одобри ниту една од двете спротивставени резолуции со кои се овластува испорака на хуманитарна помош за северозападна Сирија, контролирана од бунтовниците, од соседна Турција.

Русија стави вето на компромисната резолуција со која би се продолжила операцијата на преминот Баб ал Хава за девет месеци, што беше поддржано од 13 од 15-те членки на Советот.

Руската резолуција која би ја продолжила испораката на помошта за шест месеци, но додаде нови услови, не ги доби минималните девет гласови „за“ за одобрување.

Испораките на помош за областа Идлиб значително се зголемија по уништувањето предизвикано од земјотресот со јачина од 7,8 степени според Рихтеровата скала што ја опустоши јужна Турција и северозападна Сирија на 8 февруари.

Сирискиот претседател Башар Асад отвори два дополнителни премини од Турција за да го зголеми протокот на помош за жртвите од земјотресот и во мај ја продолжи нивната операција за три месеци до средината на август.

Тие премини не се споменати во ниту една резолуција, а рускиот амбасадор во ОН Василиј Небензија посочи дека тие засега ќе останат отворени.