Хоџај: Приштина ќе ги преоцени своите односи со Србија по апсењето на Харадинај

Министерот за надворешни работи на Косово Енвер Хоџај синоќа изјави дека неговата земја веќе презела соодветни мерки против соседна Србија и тоа повторно ќе го стори во иднина, откако поранешниот косовски премиер Рамуш Харадинај беше уапсен во Франција по потерница издадена од Белград, пренесоа британските медиуми.

Апсењето на Харадинај, командант на ОВК од војната во 1998-1999 година на Косово, и косовски премиер во 2004-2005 година,  во средата на аеродромот во Базел, ги зголемува тензиите меѓу двете балкански соседни држави, забележува БТА.

Косово во 2008 година ја прогласи својата независност од Србија. Двете земји сакаат да се приклучат кон Европската Унија, но Брисел соопштува дека прво треба да ги нормализираат своите односи.

Косовските опозициски партии повикаа на прекин на преговорите меѓу Белград и Приштина со посредништво на ЕУ.

-Вчера ние презедовме реципрочни мерки со српскиот претседател Томислав Николиќ и тоа повторно ќе го направиме во иднина, изјави Хоџај пред новинарите во Приштина. „Треба да има ревизија на нашите односи со Србија и ревизија на дијалогот“, додаде тој.

Хоџај изјави дека Србија издала и други меѓународни потерници за апсење на косовски државјани, ограничувајќи го нивното патување во странство.