Хамас се заканува дека ќе ги погуби заробените Израелци поради нападот врз Газа

Хамас соопшти дека ќе погубува по еден израелски затвореник за секоја нова цивилна куќа што ќе биде бомбардирана без предупредување, пренесува новинската агенција Ројтерс.

Абу Обаида, портпарол на групата, рече дека тие дејствувале во согласност со исламските упатства со тоа што ги чувале израелските затвореници сигурни и здрави, пренесува Ројтерс.

„На секое таргетирање на невини цивили без предупредување, за жал, ќе биде одговорено со егзекуција на еден од затворениците во нашиот притвор и ние ќе бидеме принудени да ја емитуваме оваа егзекуција“, рече тој.

Израелската армија најавува дека ќе изврши еден од најголемите воздушни напади досега врз Хамас во опколениот Појас Газа.

Израелските медиуми, исто така, објавија дека Израел погодил 1.000 цели во Газа, додавајќи дека армијата најавила дека ќе продолжи со воздушните напади врз Газа, дури и по цена да им наштети на израелските затвореници во енклавата.

Израелскиот премиер најави и дека ќе следува копнен напад и влегување во Појасот Газа на израелската војска.