Хамас подготвен да ги ослободи сите заложници во замена за завршување на војната во Појасот Газа

Висок функционер на палестински Хамас денеска изјави дека движењето е подготвено да ги ослободи сите израелски заложници во замена за гаранции дека Израел ќе ја заврши војната во Појасот Газа.

Делегација на Хамас моментално е во Каиро на разговори со египетските и катарските претставници, кои посредуваат заедно со САД за постигнување примирје на палестинската територија.

-Подготвени сме да ги ослободиме сите Израелци (заложници) како дел од вистинскиот договор за размена на затвореници и во замена за прекин на војната, повлекување на израелските сили од Појасот Газа и влез на хуманитарна помош, изјави функционерот на Хамас, Тахер ал-Нуну.

Меѓутоа, тој го обвини Израел дека го попречува напредокот кон прекин на огнот.

-Проблемот не е бројот на заложниците што ќе бидат ослободени, туку фактот што Израел не ги исполнува своите обврски, го блокира спроведувањето на договорот за прекин на огнот и продолжувањето на војната, изјави претставникот на Хамас.

Според него, токму од овие причини Хамас инсистира на потребата од гаранции за да се принуди Израел да го почитува договорот.

Првата фаза од прекинот на огнот, меѓу 19 јануари и 17 март, овозможи враќање на 33 заложници, вклучително и осум мртви, во замена за ослободување на околу 1.800 палестински затвореници.