Грчките политички лидери и честитаа на Меркел

Грчките политички лидери и ја честитаа победата на Ангела  Меркел, и покрај шпекулациите во грчката јавност за последиците врз Грција од изборите во Германија.

Премиерот Алексис Ципрас и честиташе на Меркел во пост на неговиот профил на Твитер, додека лидерот на конзервативната опозициска партија Нова демократија Кирјакос Мицотакис и испрати писмо во кое ја поздравува нејзината четврта последователна изборна победа.

- Солидарна и демократска Европа денес се поважни и неопходни од кога и да е, напиша Ципрас на Твитер и додаде дека секој кој верува во тоа мора да работи со цел да ги продлабочи и прошири европските вредности.

Мицотакис, пак, смета дека изборниот резултат во Германија „создаде прозорец на можности за храбри промени во Европа“.

- Промени кои ќе влијаат врз животот и безбедноста на многумина, со цел на маргините да не остане ниту еден граѓанин, напиша Мицотакис во писмото до Меркел.