„Граѓаните“ не го даваат врвот во Премиер лигата

Манчестер сити се врати на првото место во Премиер лигата на две кола пред крајот на лигата, откако по 12-ти пат едноподруго победија во лигашки натпревар, овојпат со 1:0 на блиското гостување кај Барнли.

 

Еден час се „тресеа“ навивачите на англискиот шампион откако нивните миленици не успеваа да го „скршат“ отпорот на незгодниот Барнли, за во 63. минута, Серхио Кун Агуеро да постигне гол по една мешаница пред голот на домаќините, иако Ешли Барнс се обиде да ја извади топката од гол-линија.

 

Со ова тимот на Пеп Гвардиола се врати на првото место со 92 поени, еден повеќе од Ливерпул со само уште два натпревари до крајот на сезоната – против Лестер дома (5 мај) и против Брајтон на гости (12 мај), кои ако ги добијат тогаш се сигурно шампиони без разлика на резултатите на Ливерпул.