Глечерите на Гренланд се топат пет пати побрзо отколку пред 20 години

Глобалното затоплување петкратно ја зголеми брзината на топење на глечерите на Гренланд во последните 20 години, соопштија денеска научниците од Универзитетот во Копенхаген.

Топењето на мразот на Гренланд предизвикува особено загриженост бидејќи древниот леден покривач, доколку целосно се стопи, има доволно вода за да го подигне нивото на морето за најмалку шест метри.

„Студијата за илјада глечери во оваа област покажа дека стапката на топење влезе во нова фаза во последните две децении“, рече Андерс Анкер Бјорк, доцент на Катедрата за геонаука и управување со природни ресурси на Универзитетот во Копенхаген.