Германец со курдско потекло обвинет за членство во ПКК

Јавното обвинителство во Штутгарт денеска покрена обвинение против еден 46-годишен Германец со курдско потекло, поради членство во забранетата Курдска работничка партија (ПКК).

Германските власти го товарат курдскиот активист за координирање на активностите на ПКК во Штутгарт, Минхен и Фрајбург, а потоа и во Дортмунд и Дизелдорф во периодот од август 2013 до 16 февруари годинава, кога бил уапсен.

Според властите, обвинетиот, кој е во притвор од февруари, во ПКК бил одговорен за организациски, финансиски и кадровски прашања.

ПКК е забранета со германските закони, затоа што е прогласена за терористичка организација.

Курдските политички активисти во Германија меѓутоа сметаат дека ПКК неправедно е ставена на листата на забранети организации, затоа што таа и нејзините сили во Ирак се сојузници на западните земји, меѓу кои и Германија, во борбата против џихадистите, а Владата во Берлин ја смета за терористичка група.