Форум за кадровски менаџмент

Организатори на форумот се Бизнис центарот на Скопски плански регион, Сојузот на стопански комори на Македонија (ССК) и општина Аеродром.

 

Розалија Карчицка Василевска, проектен координатор на Бизнис центарот при Скопски плански регион информира дека форумот како потреба е идентификуван во рамки на серијата информативни и советодавни настани за мали и средни претпријатија. 

 

- Поканети се презентери од областа на кадровскиот менаџмент и човечките ресурси кои со своите експертизи, знаења и новите алатки што се применуваат во оваа областа ќе можат да ги запознаат нашите слушатели, претежно малите и средни претпријатија, со тоа како да ја подобрат ефективноста на своите вработени, ефективноста во менаџирањето и како да постигнат поголема профитабилност на своите компании, рече Карчицка Василевска. 

 

Извршниот директор на ССК Митко Алексов истакна дека квалитетното раководење на компанија и нејзиниот успех во голема мера зависи од кадровскиот менаџер, односно од правилното и квалитетно менаџирање со вработените во компанијата и од нивната професионална надградба, како и соодветна внатрешна организација на самата компанија.

 

- Добриот кадровски менаџмент во една компанија е двигател на напредокот и успехот на истата компанија. Преку личниот развој на вработените и коучингот, компанијата вложува и придонесува за својата зголемена профитабилност, рече Алексов. 

 

Учесниците ќе имаат презентации и ќе дебатираат на актуелни теми од кадровскиот менаџмент, за управување со таленти, трендовите на пазарот на трудот, личниот развој на вработениот и коучингот, социјална интелигенција, справување со тешките карактери на работа, како и за реконструирањето на организацијата за воведување на систем на награди и унапредување на работни места.