Финска ќе гласа за закон кој го забрзува патот кон НАТО

Финските пратеници попладне ќе гласаат за закон кој ќе и овозможи на нивната земја да го забрза процесот на пристапување во НАТО.

Доколку овој закон биде усвоен, Финска може брзо да реагира дури и ако очекуваните ратификации од Турција и Унгарија дојдат во момент кога таа сè уште нема да има формирана влада по парламентарните избори во април, пренесува „Гардијан“.

Се очекува овој закон да биде изгласан без никакви проблеми.

Финскиот претседател Саули Ниинисто минатата недела изјави дека ќе го потпише овој закон, но дека тоа „од практични причини“ може да почека до изборите во април.

Усвојувањето на овој закон не значи дека Финска автоматски ќе влезе во НАТО кога Турција и Унгарија ќе го ратификуваат нејзиниот прием во оваа организација, но донесува краен рок до кога Финска ќе чека на соседна Шведска истовремено да влезат во НАТО.