ФИФА: Македонија 141-ва во светот

Пад од три места бележи македонската фудбалска репрезентација на најновата ранг листа на Светската фудбалска федерација (ФИФА), која е објавена во четвртокот.

 

Назадувањето на националниот тим се должи на двата пораза, од Словенија и од Бугарија, во контролните натпревари. Пред Македонија, од 130-то до 140-то место се наоѓаат Танзанија, Палестина, Бахреин, Гвајана, Азербејџан, Свазиленд, Намибија, Аруба, Мадагаскар, Литванија и Сен Лука.

 

На ФИФА ранг листата има 204 репрезентации, а Македонија има подобар рејтинг од само шест европски селекции: Луксембург (145), Молдавија (156), Малта (164), Лихтенштајн (173), Сан Марино (200) и Андора (202).

 

Од противниците со кои Македонија ќе игра во квалфикациите за пласман на СП во Русија, полош рејтинг има само Лихтенштајн (173), а пред „црвено жолтите“ се Шпанија (6), Италија (15), Албанија (45) и Израел (76).

 

На листата на ФИФА, сега прва е Аргентина која на врвот ја смени Белгија, Чиле се искачи на третата, а Колумбија на четвртата позиција, додека на петтото место е актуелниот светски првак Германија.