Фицо: Наскоро ќе се формира европската крајбрежна полиција

Словачкиот премиер Роберт Фицо изјави дека по Самитот на ЕУ во Братислава е убеден оти Европската крајбрежна и гранична полиција ќе почне со работа до крајот на годинава.

Како што јави дописникот на МИА од Прага, Фицо денеска во емисија на Чешката државна телевизија (ЧТ) соопшти дека таа полиција има задача да ја засили заштитата на надворешните граници на Унијата од нелегалната миграција.

Според Фицо, братиславскиот Самит придонел да не се отвараат теми кои ЕУ ја разединуваат, вклучувајќи го тука и прашањето за бегалските квоти, кое за него е ,,мртва агенда".

Наместо тоа, како што тврди Фицо, учесниците говореле за теми кои им се заеднички и ги соединуваат, како онаа за заштита на надворешните граници.