ФФМ ќе чека судска одлука за „случајот Башкими“

Претседателот на Фудбалската федерација на Македонија (ФФМ), Масар Омерагиќ, информира дека ја чека судската одлука па потоа да одлучи како ќе се дејствува околу „случајот Башкими“.

– За сите сомнителни натпревари ние добиваме дописи од УЕФА, никогаш не дејствуваме самоиницијативно, затоа што немаме и ресурси за самостојни истраги. Затоа, по секој сомнителен натпревар добиваме допис од УЕФА со прецизно изнесени податоци за нарушен интегритетот. Ние потоа ги информираме надлежните, односно испраќаме допис до МВР, а надлежните државни институции го преземаат случајот. За Башкими сум информиран дека процедурата од обвинителство е испратена во суд, со имиња и презимиња на лицата кои се обвинети за неовластено примање на подароци. Ние можеме да дејствуваме по правосилна судска пресуда. Ги суспендиравме лицата кои признаа вина. Меѓутоа, за да преземеме мерки против било кој клуб, ние мора да добиеме правосилна судска пресуда. Се додека не добиеме пресуда, Башкими ќе игра во Првата лига, изјави Омерагиќ.

Натпреварот меѓу Кожуф и Башкими е под истрага поради сознанија местење резултат.

МИА