Европскиот парламент и земјите-членки на ЕУ постигнаа договор за реформа на буџетските правила

Европскиот парламент и земјите-членки на ЕУ синоќа постигнаа договор за реформа на буџетските правила на Унијата. Целта е да се обезбеди закрепнување на државните финансии и во исто време да се зачуваат инвестициите.

Мерката, за која се дискутира повеќе од две години, беше критикувана поради големата сложеност, а левичарските европратеници ја дефинираат како алатка за наметнување на штедење во Европа.

Сепак, претседателката на Европската комисија, Урсула фон дер Лејен денеска го изрази своето задоволство од постигнатиот договор.

„Го поздравувам политичкиот договор за нашата амбициозна реформа на економското управување на ЕУ“, напиша Фон дер Лејен на социјалната мрежа Х.

Таа изрази уверување дека мерката ќе придонесе „за конкурентна и правична европска економија“, тврдејќи дека „новите правила ќе им овозможат на земјите од Европската Унија да инвестираат во свои активи, а во исто време да ги консолидираат своите јавни финансии“.

Договорот, постигнат по 16 часа дискусии, ќе им овозможи на земјите од ЕУ да ги спроведат новите правила при подготовката на своите буџети за следната година.

Реформата има за цел да го модернизира Пактот за стабилност, кој датира од доцните 1990-ти, кој го ограничува буџетскиот дефицит и државниот долг на секоја земја-членка на 3 отсто и 60 отсто од нејзиниот бруто домашен производ, соодветно. Оценета како премногу драстична, оваа рамка всушност не беше почитувана и се сметаше за застарена.

И покрај тоа што ги потврдува овие симболични коефициенти, реформата овозможува поголема флексибилност во потребата од прилагодувања во случај на преголем буџетски дефицит. Поконкретно, тоа им дава на земјите повеќе простор за маневрирање за да обезбедат одржливи нивоа на долг, давајќи им повеќе време да преземат реформи и инвестиции.