ЕК тврди дека не е затворена македонско-грчката граница

Европската комисија денеска негираше дека има целосна блокада за премин на лица на македонско-грчката граница, откако Австрија ги затвори премините за бегалци од Арапскиот свет и Африка, јави дописникот на МИА од Брисел.

 

Портпаролката на Еврокомисијата задолжена за миграциски прашања, Наташа Берто, посочи дека на Самитот на Европскиот совет минатата недела лидерите на 28-те земји-членки на ЕУ се обврзале да превземат европски одговор на бегалска криза.

 

Во однос на другите гранични мерки што се превземаат, спроед Берто, важно е за Брисел да има продолжен дијалог меѓу различните ЕУ-земји и државите долж западно-балканската рута преку координацискиот механизам што бил активен викендов.

 

- Земјите се информираа меѓу себе што се случува. А, сигурно е дека ниту една граница не е затворена и движењето се одвива, а Еврокомисијата ќе продолжи да ја олеснува координација меѓу различните земји, посочи Наташа Берто.

 

На прашањето дали е координирано блокирањето на протокот на Авганистанци, што започна од Австрија, а продолжува со Хрватска, Србија и Македонија, гласноговорничката на ЕК одби да даде директен одговор, но истакна дека постои релокациска шема за Грција и програм со Турција што треба координирано да го менаџира напливот на бегалци на западно-балканската рута. Таа беше децидна дека Брисел инсистира земјите „да се информираат за тоа какви мерки преземаат пред да ги преземат“.

 

На конкретното прашање дали во моментов е затворена границата меѓу Република Македонија и Грција, Берто одговори негативно, но додаде дека тоа е одговор „од луѓето што ги менаџираат границите“.

 

- Како што знаеме од нашите контакти, се уште има движење долж границата и нема целосно затворање на границата во моментов. Координациската рамка на земјите долж западно-балканската рута беше активна викендов и различни информации се делеа меѓу страните. Границата не е затворена, поминувањето е можно на различни граници. А, за тоа што е легално во однос на тоа кои лица се пропуштаат е видливо и улогата е јасна за тоа кој може да се прифати и третира според Женевската конвенција, бидејќи ЕУ-правото не се применува за ова на трети земји, образложи Берто.