ЕК може да побара од Гугл да продаде дел од својот бизнис со технологија за рекламирање

Европската комисија би можела да побара од Гугл да продаде дел од својот бизнис со технологија за рекламирање, рече извор запознаен со ова прашање, што сигнализира обид да се олесни доминацијата на американскиот гигант на пазарот.

Минатата година, Комисијата почна истрага за присуството на Гугл на речиси сите нивоа на онлајн рекламирање, изразувајќи загриженост за доминантната позиција на американскиот гигант.

Брисел ретко бара поделба на бизнисот, но Гугл не ги решава поплаките за конкуренцијата, со што се продлабочува фрустрацијата, рече изворот, додавајќи дека формална жалба може да биде објавена веќе в среда.

Комисијата и Гугл не одговорија веднаш на барањето за коментар на информациите на неименуваниот извор.

Платформата за дигитално рекламирање на Гугл е број еден во светот, со 28 отсто удел во приходите, според истражувачката компанија Инсајдер Интелиџенс (Insider Intelligence).

Во првиот квартал, рекламирањето донесе приход од 54,55 милијарди долари за матичната компанија на Гугл, Алфабет. Вкупниот приход беше 69,79 милијарди долари.

Доминацијата на Гугл во онлајн рекламирањето беше под лупа во последниве години, а поплаките од конкурентите резултираа со регулаторни истраги на повеќе континенти.