Две третини од заразените со Омикрон во Британија веќе прележале Ковид

Две третини од луѓето кои неодамна биле заразени со омикрон, претходно прележале ковид, покажува студијата „Реакт“ спроведена во Велика Британија.

Потребно е повеќе работа за да се открие колку реални повторни инфекции има, но резултатите откриваат групи кои се чини дека имаат поголема веројатност повторно да заболат од Ковид. Студијата е спроведена на здравствени работници и домаќинства со деца или многу членови на семејството под еден покрив.

Повеќе од два милиони луѓе се тестирани во студијата, а најновите наоди се базираат на околу 100.000 ПЦР тестови.

Околу 4.000 биле позитивни, што е убедливо највисока стапка од почетокот на пандемијата.

Кога нивниот избор бил секвенциониран за да се тестира за која варијанта на ковид станува збор, речиси сите имаа омикрон – многу заразна варијанта, првпат откриена во Јужна Африка.

Сè уште не е јасно колку доброволци кои биле позитивни на тестот биле целосно вакцинирани, имајќи на ум дека е потребна втора доза на вакцина за борбата против омикрон.

Она што ги изненади научниците е фактот што двајца од тројца испитаници рекле дека претходно прележале Ковид.