Две деца и натаму во критична состојба, наставничката и останатите ученици стабилни

Директорот на универзитетскиот Клинички центар Србија, професор доктор Милика Ашанин изјави дека тројца од четворицата ранети во Ургентниот центар во Белград се сосема добро, будни се и докторите разговараат со нив. Станува збор за двајца ученици и наставничка.

„Што се однесува до четвртиот пациент, тој е примен со тешки, комплексни прострелни повреди на градниот кош, на вратот и ‘рбетот. Врз него беа извршени две операции. Подобар е, буден е, но мора да бидеме многу внимателни и да квалификуваме дека состојбата е критична. Денеска ќе направиме серија на прегледи и снимки за да ги видиме ефектите од операциите“, изјави доктор Ашанин.

Директорот на универзитетската Детска клиника Тиршова, доктор Синиша Дучиќ рече дека две момчиња со прострелни рани во нозете, кои се сместени на таа институција, се стабилно, додека девојче е оперирано како итен случај, со повреди во главата, витално е загрозена и се наоѓа во критична состојба.