Дознаките на албанските иселеници за девет месеци 1,05 милијарди евра

Податоците на Централна банка на Албанија покажуваат дека растот на дознаките на иселениците, кои минатата година достигна највисоко ниво, продолжил во текот на ова календарска година.

Според банката, во периодот јануари-септември годинава дознаките на иселениците достигнале 1,05 милијарди евра, што претставува зголемување од 16,3, отсто споредено со истиот период минатата година.

-Во текот на 2022 година, што го потврдува и Евростат, тие достигнале 1,2 милијарди евра, што е зголемување од 5,8 отсто во споредба со претходната година и претставува највисоко ниво во последната деценија. Тие сочинуваат 10 отсто од бруто домашниот производ (БДП) а што се однесува до земјите од каде доаѓаат Италија е главниот извор, потоа следат Велика Британија и Германија, па Грција и Соединетите американски држави, наведуваат медиумите.

Растот на дознаките доби поттик од иселувањето во последната деценија, со што дознаките од странство станаа важен извор на приходи за албанските семејства и значајна ставка во платниот биланс на земјата.

- Од 1992 година кога почнаа првите имигрантски текови, до крајот на 2022 година во албанската економија влегле 30 милијарди евра. Обезбедиле приходи од 13 до 20 отсто од семејниот буџет. Значи, секое 5 семејство во земјава живее со помош на роднини во емиграција, оценуваат медиумите.

Во неодамнешна студија спроведена од Светска банка и Централна банка на Албанија за периодот 2013-2018 година, произлегува дека едно семејство во просек добивало по 2.000 евра секоја година.