Дождовите ги полнат реките

Водостоите на речиси сите реки во земјава се зголемуваат по последните врнежи од дожд и се повисоки од вчера иако се уште се под просекот за април, покажуваат мерењата што ги направи Управата за хидрометеоролошки работи (УХМР).

Исклучок се Крива Река кај Крива Паланка, Брегалница кај Штип и Црн Дрим кај Ложани каде има благо намалување во однос на вчера и Пчиња каде нивото е исто со вчерашното на мерните места во Пелинце и Катлановска Бања.

Водостоите, пак, на природните езера во земјава се исти како вчера. Нивото на Дојранското Езеро е повисоко за речиси три метри во однос на повеќегодишниот просек, а кај Охридското и Преспанското е пониско од вообичаеното за овој период од годината.