Дел од пациентите со дијабетес останаа без инсулин - Таравари вели дека новиот тендер ќе заврши многу скоро

Пациенти со дијабетес останаа без инсулин. Од Сојузот на здруженија на дијабетичари алармираат дека околу 2000 лица се оставени без терапијата која им е неопходна за регулирање на шеќерот во крвта. Според нивните сознанија во државата недостигаат 6 видови на инсулини меѓу кои и 3 за Тип 1 кои ги користат деца.

Апелираат оваа терапија итно да им биде достапна на сите и што побргу да заврши новиот тендер, а во меѓувреме да не се експериментира со замена на инсулините.

-Бидејќи согласно информациите од сите финансиски извешаи кои се достапни нема проблем да се потпишат договорите. Час поскоро да се дополнат количините кои недостасуваат, изјави Димче Велев, претседател на Сојузот на здруженија на дијабетичари

Министерот за здравство најави дека новата набавка на инсулин е во тек и постапката ќе заврши многу скоро.

-Во тек е процедурата за набавка и на инсулин, се надевам дека наскоро ќе заврши. Не недостасува секаде, туку само на некои места и наскоро ќе се дополни и ќе го објавиме и името на добавувачот, рече Арбен Таравари, министер за здравство.

Во Македонија на инсулинска терапија се околу 40.000 лица, од нив 4.000 имаат дијабетес тип 1.