Дарио Ивановски со личен рекорд победник на полумаратонот во Белград

Македонскиот атлетичар Дарио Ивановски е победник на денешната полумаратонска трка што се одржа во склоп на 30.то издание на Белградскиот маратон.

 

Тој патеката од 21,1 километар ја истрча за 1:10.00 час, што претставува негов личен рекорд и подобро време од лани истрчаното на Скопски маратон - 1:11.14 час.

Ивановски имаше за 40 секунди подобар резултат од второпласираниот Бојовиќ од Србија. Од македонските натпреварувачи на 5.место се пласира Милош Ранчиќ, а Игор Јакимовски беше 11.ти на полумаратонската трка и прв во својата возрасна категорија. 

На полумаратонската трка кај жените победи Слаѓана Перуновиќ од Србија – 1:21.40 час, а второто место и припадна на Наталија Грац од Полска, додека трета на целта стигна Александра Маринков (Србија).

 

На мартонската трка најбрз беше Стивен Кипнгетич Катам од Кенија со време 2:21.11 часа, додека кај жените најдобар резултат имаше Оливера Јевтиќ од Србија со време 2:38.00 часа. 

На овој маратон учествуваат и голем број натпреварувачи од Македонија кои се подготвуваат за Скопски маратон што ќе се одржи на 7.мај.