Чолаку: Треба да се нормализираат односите со Србија

Официјална Приштина смета дека е време за целосно нормализирање на односите меѓу Косово и Србија, изјави Беким Чолаку, шеф на кабинетот на косовскиот претседател Хашим Тачи.

- Ние во Косово остануваме определени и подготвени за постигнување на оваа цел и за отворање ново поглавје на соработка. Очекуваме идентична подготвеност и определба и од раководството на Србија, посочува Чолаку.

Тој смета дека официјалните претставнци на Србија треба да се воздржат од опасни политички изјави за поделба на Косово.

- Овие идеји, независно од каде доаѓаат, тие едноставно се застарени и не придонесуваат за стабилноста во регионот, знаејќи какви последици ќе имаат тие, како резултат на така наречениот „домино ефект“, за целиот регион, смета Чолаку.

Пренесувајќи ја изјавата на Чолаку, порталот Албеу, потсетува дека шефот на српската дипломатија Ивица Дачиќ и претходно ја промовирал идејата за поделба на Косово.

„Неодамна и претседателот на Србија Александар Вучиќ побара внатрешна дебата во Србија во врска со прашањето за Косово, кое Србија се уште го смета за нерешено и покрај фактот што Косово е признато од 114 држави, констатира порталот.