Челзи и Бенфика се првите четвртфиналисти во Лигата на шампиони

Англискиот претставник Челзи ја елиминира германската екипа Борусија совладувајќи ја со 2-0, а со тоа ја надополни негатива од 0-1 по првата средба во Дортмунд

 

„Сините“ преку Рахим Стерлинг во 43 минута го постигнаа првиот гол, а на самиот почеток на вториот дел, Челзи доби пенал кој го изведе Хаверц. Во првиот обид тој ја погоди стативата, но пеналот беше повторен па Хаверц втор пат не згреши и зголеми на 2-0, што подоцна се покажа како конечен резултат на мечот. 

 

Друштво на Чези меѓу осумте најдобри ќе му прави Бенфика која и во реваншот беше подобра од Клуб Бриж. По гостинските 2-0, португалската екипа на домашен терен славеше со убедливи 5-1. 

 

Кои два тима ќе им се приклучат на Челзи и Бенфика во четвртфиналето ќе дознаеме вечерва откако во Минхен и Лондон своите реванш дуели ќе ги одиграат Баерн и ПСЖ, односно Тотенхем и Милан, средби во кои германскиот и италијанскиот тим ќе влезат со минимална предност од 1-0 остварена на првите дуели. 

 

Натпреварите започнуваат во стандардниот термин од 21 часот.