Брутално убиен издавач на секуларни книги во Бангладеш

Еден издавач на секуларни книги во Бангладеш е брутално убиен и „искасапен до смрт“, соопшти полицијата во главниот град Дака.

Убиството на издавачот се случи неполни 24 часови по нападот и обидот за убиство на еден друг бангладешки издавач, како и на двајца блогери кои успеаја да преживеат, иако едниот од нив се бори за својот живот.

Според полициското соопштение, издавачот Фејсал Арефин Дипон (43) бил убиен во неговата канцеларија, што се наоѓа во центарот на Дака.

Локалната филијала на терористичката мрежа на Ал Каеда, исламистичката група Ансар ал Ислам, ја презеде одговорноста за сите напади и за убиството на Дипон.

Годинава, Бангладеш се соочува со серија брутални напади на исламистите врз секуларните писатели и блогери, што беа извршени во Дака и во внатрешноста од земјата.

Нападите започнаа во февруари годинава, кога во својот стан беше убиен со мачети блогерот Авиџит Рој кој пишуваше против исламскиот радикализам, исламистите и религиозниот конзервативизам.

Двајцата нападнати издавачи, објавуваа дела на Рој кој постојано живееше во САД и имаше двојно, американско и бангладешко државјанство.

Во серијата напади годинава, на ист брутален напад, беа убиени уште тројца други секуларни блогери и интелектуалци.

Полицијата во Бангледаш и властите се оправдуваат дека засега не може да го запрат овој бран од брутални убиства, но поголемиот дел од јавноста ја осудува владата дека не прави ништо за да се елиминира насилството на исламистите.