Брисел задоволен од изборот на преодната Влада

Европската комисија е задоволна од вчерашниот избор на преодната Влада во македонското Собрание, што е една од клучните и речиси последни точки од договорот од јуни/јули што беше посредуван од еврокомесарот за преговори за проширување Јоханес Хан. Како што јавува дописникот на МИА од Брисел, портпаролката на Хан, Маја Коцијанчич, во име на Еврокомисијата порача дека сето ова се чекори во насока на надминување на политичката криза.

- Знаете многу добро дека бевме повеќе од јасни во инсистирањето за имплементирањето на политичкиот договор што беше олеснуван од страна на комесарот Хан преку летото. Сите чекори во оваа насока се нешто што е потребно во насока на остварување на договореното, порача гласноговорничката на Еврокомисијата.

Во Брисел се посебно задоволни што е комплетирана клучната и претпоследна точка од договорот од Пржино, по што останува уште договорената оставка на претседателот на македонската Влада на 100 дена пред одржувањето на изборите на 24 април 2016 година и целосно да се заокружи политичкиот договор што стави крај на политичката криза во Република Македонија.