БГНЕС: Околу 15.000 Македонци со помош од Бугарија вратени за време на пандемијата

Вкупно 15.237  Македонци се вратени во нивната татковина за време на епидемијата од коронавирусот благодарение на деноноќните напори на бугарската дипломатија, јави БГНЕС.

Оваа бројка, како што  се наведува во текстот, се однесува заклучно со 5 јуни и таа со сигурност е зголемена за уште околу илјада лица, бидејќи секој ден низ Бугарија поминуваат меѓу 250 и 350 Македонци.

-Се започна ноќта на 14 март кога светот „се затвори“ и илјадници Македонци останаа блокирани  по аеродромите, на станиците и на граничните премини  во Азија, Блискиот Исток, Европа и Северна Америка. До 15 април само за еден месец, благодарение на нашите дипломатски мисии во светот и најмногу на оние во Европа само преку аеродромот во Софија се прибрани 7.523 Македонци, изјави дипломат од македонското МНР за агенцијата.

-Имаше случаи кога сме ѕвонеле на бугарски конзули во 4 часот изутрина,  многу непристојно, но требаше  да прибереме стотици „заглавени сонародници“ по границите, раскажува за дипломатот за БГНЕС.

Дипломатот, кој не сакаше да го соопшти името, подвлекува дека „меѓу спасените“  биле и ќерка на актуелен македонски министер, блиски на пратеници од опозицијата, но и на познати јавни личности.

Бугарската гранична полиција, додава агенцијата, заедно со здравствените власти без каков било компромис ги почитуваа безбедносните мерки, а бугарското МНР  помага за  поврзување со транспортната компанија која ги превезува Македонците до граничниот премин  Ѓуешево-Деве Баир.