Белгија: 1049 нови случаи на коронавирус, прв случај на инфицирано домашно милениче

Белгиските здравствени власти регистрирале 1049 нови заразени од коронавирусот во земјата, а регистриран е и првиот случај на зараза на домашна мачка.

Станува збор за домашна мачка која била заразена од човек, утврдила универзитетската лабораторија во Лиеж, Белгија.

-Ваквиот тип на зараза од човек кон животно бара близок контакт, и станува збор за изолиран случај, но властите предлагаат да се усвојат мерките на претпазливост за заразени лица кои имаат домашни миленичиња, а за сега немаме причина да мислиме дека миленичињата се вектор на болеста, изјави портпаролот на центарот за криза, Емануел Андре.

Белгија во последните 24 часа регистрирала 1049 нови случаи на заразени од коронавирусот, со што вкупниот број заразени сега изнесува 7284 во целата земја, од кои најголемиот број од нив се наоѓаат на северот на земјата.

Во последните 24 часа се хоспитализирани 490 нови пациенти, а 183 се пуштени од болница. Вкупниот број хоспитализирани е 3042.

Починале нови 69 пациенти од вчера, а 85 пациенти се префрлени на интензивна нега во последните 24 часа, информираа властите. Вкупниот број починати е 289 лица.