Базна станица за фотографирање за лични документи во Ростуше

Министерот за внатрешни работи Оливер Спасовски денеска ја посети полициската станица во Жировница и полициското одделение во Ростуше каде ја промовираше базната станица за фотографирање за лични документи.

- Денеска се реализираше уште едно барање на граѓаните од овој регион, кои досега немаа можност да вадат пасоши и лични карти во Ростуше, туку за тоа се одеше во Гостивар. По согледувањето на можностите од страна на МВР, донесов одлука и граѓаните од оваа општина од денеска овде можат да се извадат лични документи, истакнал Спасовски. 

Како што соопшти МВР, ова е важно не само за овој регион, туку и за Гостивар, затоа што и таму ќе се растовари Одделението за управни работи.

- Ова е во рамки на определбата дека ќе работиме во функција на граѓаните за МВР да се доближи до граѓаните и да се врати довербата. Во наредниот период ќе се преземат активности  и други услуги да им бидат достапни на граѓаните во ПО Ростуше, нагласил Спасовски. 

Министерот Спасовски во рамки на посетата на Жировница и Ростуше, како што се наведува, разговарал и со командирите на полициските станици и началникот на СВР Тетово за актуелните проблеми со кои се соочуваат во текот на работењето и начинот како тие да се решат. 

- Многу е важно и полицајците да бидат задоволни ако сакаме да имаме безбедна држава и затоа мора да се подобрат условите за работа на полицајците. Веќе е почната постапка за набавка на нови униформи, затоа што веќе една деценија МВР нема купено униформи за полицајците, истакнал Спасовски.