Бан Ки-мун во Женева посади дрво од Хирошима

Генералниот секретар на ОН, Бан Ки-мун, денеска во паркот крај зградата на ОН во Женева посади дрво од јапонскиот град Хирошима, што е подарок од градоначалникот Кадзуми Мацуи, кој е и претседател на асоцијацијата „Градоначалници за мир“ , пренесоа француските медиуми.

Дрвото е гинко билоба, што може да порасне до 15 метри во височина.

-Ова дрво е симбол на издржливоста и на мирот и се сади во спомен на оние кои загинаа на 6 август 1945 година, кога атомска бомба експлодира во Хирошима, изјави Бан на церемонијата.

Дрвото, сега високо 1,50 метар, е „потомок“ на дрвото гинко билоба, што ја преживеало атомската катаклизма во Хирошима, забележуваат француските медиуми.

-Државите, кои поседуваат нуклеарно оружје, имаат специјална задача да ги елиминираат своите арсенали, рече Бан и потсети дека за сите земји треба да е приоритет продолжувањето на преговорите за нуклеарно разоружување.

Бан Ки-мун се наоѓа во дводневна посета на Женева. За време на неа тој ќе се збогува со службениците на ОН во Женева, со претставници на власта на кантонот Женева и со швајцарските федерални власти пред крајот на неговиот мандат, што завршува на крајот на календарската година.