Азар: Со Реал уште нема ништо

Ѕвездата на Челзи, Еден Азар се обиде да побегне од прашањата дали ќе заигра во Реал Мадрид од следната сезона. Шпанските медиуми споделија дека се разбрал со „белите“ за 5-годишен договор, иако се уште нема разбирање помеѓу двата клуба.

На прес-конференцијата пред натпреварот на националниот тим на Белгија против Кипар, медиумите го притиснаа во аголот со прашања за евентуална зделка со Реал. Првично Азар одговори само со: „Не сум тука за да зборувам за Реал“.

Но новинарите продолжија да го притискаат и да бараат одговор на прашањето дали најсилниот белгиски фудбалер ќе заигра во гигантот од Мадрид. Потоа офанзивниот фудбалер одговори само со неколку реченици.

„Видете, со Реал Мадрид се уште нема ништо. Престанете да ме прашувате на оваа тема, во моментов мислам само за натпреварот со Кипар и немам ништо друго во главата“, беше коментарот на Азар, по што зборуваше само за случувањата околу „црвените ѓаволи“