Асфалтирање улици во Делчево

Се асфалтираа две улици во населбата Милково брдо во Делчево во должина од 400 метри со вкупна вредност од околу четири милиони денари, средства обезбедени од буџетот на Општината.

Како што изјави раководителот на Одделението за урбанизам, Горан Петровски, станува збор за реконструкција и асфалтирање на улиците „Вељко Влаховиќ“ и „Питу Гули“ кои биле доста оштетени и подолго време им создаваа проблеми на граѓаните од овој дел на градот.

- Претходно на улицата „Вељко Влаховиќ“, екипи на ЈПКД „Брегалница“ извршија промена на азбестните водоводни цевки со нови ПВЦ, како и вградување на потребните пропратни елементи со што се создаде можност за почеток на реконструкцијата на улицата, информира Петровски.

Деновиве заврши и асфалтирањето на крак 1 од улицата „Питу Гули“ во должина од 74 метри и профил од 6 метри, како и асфалтирање на крак 2 од истата улица, во должина од околу 60 метри и профил од шест метри. Асфалтирањето се врши со асфалт со големина на фракција БНС 16А, рече Петровски.

Во моментов во Делчево се вршат подготвителни активности за асфалтирање на улицита „Светозар Марковиќ“ во центарот на градот, каде претходно беа заменети водоводните азбестни цевки со нови полиетиленски цевки и беше поставена атмосферска канализација во должина од околу 400 метри.