Loading Video...
Фудбал
8. November 2019 - 14:05

Ангеловски го објави списокот за последните два меча против Австрија и Израел

Селекторот на најдобрата машка репрезентација Игор Ангеловски го објави списокот за последните два евро-квалификациски натпревари. На списокот на селекторот Ангеловски има 23-ца фудбалери за претстојните два натпревари против Австрија и Израел, во рамките од квалификациите за ЕУРО 2020. 
 
Висар Муслиу, Бобан Николов и Илија Несторовски поради жолти картони нема да бидат во комбинација за настап за натпреварот против Австрија, додека поради повреда Аријан Адеми ќе ги пропушти два натпревари. 
 
Дебитант во најдобрата македонска репрезентација е фудбалерот на Вардар, Даниел Аврамовски, а повратник во тимот е Никола Ѓорѓев од швајцарски Грасхоперс.
 
Македонија е сеуште во трка за втората позиција во група Г, а за да остане така, односно да стигне до посакуваната цел, пласман на ЕП ќе мора да ги добие двата натпревари. 
 
„Ќе се обидеме да го извлечеме најдоброто од тимот на следните два меча. Австрија не надигра дома. Но, тоа е само мотив плус за нас да се покажеме во подобро светло. Не ни е сеедно како ќе заврши мечот во Виена. Се наоѓаме во ситуација да мора да размислуваме и за Косово и полуфиналето на Лигата на Нациите, затоа што немаме пријателски натпревари по овие дуели“, изјави селекторот Ангеловски.
 
Собирот на репрезентацијата е во понеделник кога ќе биде одработен и првиот тренинг. Репрезентацијата за Виена патува во петок, а мечот против Австрија е ден подоцна (сабота - 16. ноември, „Ернст Хапел“, од 20:45 часот)
 
Три дена подоцна (вторник - 19. Ноември, од 20:45 часот) на Национална арена „Тодор Проески“ во Скопје ќе го одиграме и последниот меч од квалификациите против Израел.