АјФон ИксАр е најпродаваниот смартфон на Епл

AјФон ИксАр е најдобро продаван смартфон на Епл откако се појави на пазарот во средината на октомври.

Смартфонот, кој чини 749 долари, беше прогласен заедно со два други модели – АјФон ИксЕс и ЕксЕс Макс. АјФон ИксАр нуди многу од клучните карактеристики на овие телефони, но по пониска цена, а аналитичарите во голема мера го сметаат за обид на Епл да понуди препознавање на лицето и најнов процесор до поголем број купувачи.

Голем број негативни прогнози од добавувачи на смартфони во последниве недели предизвикаа стравувања дека моделот може да не се продава толку добро колку што се надеваше Епл. Таквите коментари, како и загриженоста на инвеститорите од изјавата на Епл на 1 ноември, кога компанијата објави дека повеќе нема да открива детали за продажбата на АјФон, доведоа до пад на акциите на Епл за повеќе од 20 отсто.

Иако Епл не дава целосни податоци за продажбата сега, компанијата редовно им открива на инвеститорите кои модели најдобро се продаваат.

Грег Јосвјак, потпретседател на Епл за маркетинг, прокоментира дека АјФон ИксАр во моментов е „најмасовниот производ и нашиот најпопуларен АјФон“.

Епл планира да ја промовира црвена верзија на АјФон ИксАр како дел од „Продукт Ред“, хуманитарна кампања, која дава дел од продажбата на нејзините црвени производи на глобалниот фонд, кој ги користи за програми во борбата против ХИВ и СИДА.