Ахмети ја осуди изјавата на Дардишта: Тоа е против каузата на ДУИ

Претседателот на Демократската унија за интеграција, Али Ахмети ја осуди изјавата на поранешната директорка на заеднички служби на Клинички центар Шкодране Дардишта. 

Рече дека таквите изјави се спротивни на каузата на партијата. 

- ДУИ во каузата ја има слободата и таквите изјави не се во интерес на партијата и на каузата, рече Ахмети пред состанкот на Генералниот совет на партијата во Тетово. 

Вчера Дардишта порача да не се игра со оган, откако опозициските партии заедно со Движењето БЕСА најавија ново парламентарно мнозинство. 

- Се уште ги имаме чизмите на таван во старата куќа, за час ги вадиме белите патики. Ние не сме сираци, ние сме никнале после војна. Не играјте со оган, затоа што на крај сами ќе изгорите во него, напиша таа на социјалната мрежа Фејсбук. 

Ахмети рече дека лажна вест е оти пратеници од партијата би можеле да преминат во новото парламентарно мнозинство. Според него, никој не вели дека не е демократски опозицијата да собере 61 пратеник. 

- Нормално е да имаат 61 пратеник, никој тоа не вели дека е недемократски. Но друго прашање е немањето концепт на Мицкоски ако формираат Влада, рече Ахмети.

Даниел Василев