Војници од руска база во Таџикистан ќе ја обезбедуваат авганистанската граница

Русија и Таџикистан се договорија да соработуваат за зајакнување на контролата на таџикистанско-авганистанската граница.

- Двете страни потврдија дека заедничките напори на вооружените сили на Таџикистан и на 201. руска воена база на територијата на Таџикистан се важен фактор за гарантирање на меѓународната безбедност, изјави денеска рускиот претседател Владимир Путин по средбата во Душанбе со таџикистанскиот лидер Емомали Рахмон.

Руската воена база во Таџикистан е создадена согласно меѓусебниот договор од октомври 2012 година. Минатата година Таџикистан го зголеми бројот на своите војници долж границата со Авганистан поради опасност од појава на вооружени наркодилери и исламистички бунтовници.