Средба на Тренчевска со претставници на Светска банка, разговарано за нов проект во делот на социјалната и детската заштита

Министерката за труд и социјална политика Јованка Тренчевска денеска оствари средба со претставници на Светска банка на која е разговарано за новиот проект во делот на социјалната и детската заштита.

Од страна на претставниците на Светска Банка, како што соопшти ресорното Министерство, бил искажан интерес за подобрување на работата на центрите за социјална работа. Тие истакнале дека можат да понудат предлог план којшто ќе ги допре сите аспекти на работа на Министерството.

Министерката Тренчевска посочила дека досегашната соработка влева сигурност за цврсти чекори напред кои ќе бидат во корист на граѓаните.

На средбата присуствувале Сара Кол-Блек, виш специјалист за социјална заштита во глобалната практика за социјална заштита и работни места во Светска банка, Бојана Нацева, виш специјалист за образование, Даниел Гароте Санчез, меѓународниот консултант за мобилност на трудот и Цвета Перушеска – Јончевска, портфолио аналитичарка во Светска Банка.