Севернокорејски хакери упаднале во стотици компјутери на јужнокорејски институции

Полицијата на Јужна Кореја денеска соопшти дека севернокорејската хакерска група Лазарус минатата година ја наруши безбедноста на стотици компјутери на 61 јужнокорејска институција во обид да изврши голем кибер напад против Сеул.

Од јуни минатата година, хакерската група упаднала во 207 компјутери користејќи го инсталираниот безбедносен софтвер, а осум медиумски фирми се меѓу погодените институции, соопшти јужнокорејската Национална полициска служба (НПС).

Како подготовка за нападот, групата Лазарус најпрво ја наруши одбраната на јужнокорејскиот продавач на безбедносен софтвер, што се користеше при инсталирање на безбедносни приклучоци за онлајн банкарство. Како резултат на тоа, во моментот кога ќе се отвори медиумска веб-страница, малициозниот код автоматски се инсталира на компјутерите со инсталиран безбедносен софтвер.

Според НПС, хакерите подготвувале кибер напад од големи размери за да ја преземат контролата врз погодените компјутери и да ги претворат во „зомби компјутери“. Сепак, обидот за упад во компјутерите навреме бил спречен од јужнокорејските власти без да биде предизвикана некаква штета.

Лазарус е хакерска група на Централното разузнавачко биро на севернокорејската Влада одговорна за упад во системот на компанијата „Сони пикчрс“ (Sony Pictures) во 2014 година.