Сакате да глумите: Кастинг за филмот „Златна петорка“ во Струмица и Скопје

Долгометражниот игран филм под работен наслов „Златна петорка“ во режија на Горан Тренчовски, поддржан од Агенцијата за филм на РМ влегува во фаза на продукција.

Сценариото е работено по драмски и прозни мотиви на Братислав Ташковски, продуцент е Дејан Милошевски, директор на фотографија е Апостол Трпески, сценограф е Кирил Спасески, а филмот треба да го монтира Андрија Зафрановиќ. 

Филмот е во продукција на „Револушн“ - Скопје, копродуцент е Македонската телевизија, а помагатели на проектот се општините Струмица, Радовиш, Василево, Босилово и Ново Село. 

Кастингот за некои улоги и за статисти за играниот филм ќе се прави утре во Домот на АРМ во Струмица и на 31 јули во „Вардар филм“ во Скопје. 

- Филмот е замислен како фикција за една прекината и за една започната љубов, меѓу кои лебдеат копнежот и предавството. Во филмската приказна нè водат протагонисти кои речиси цел живот бегаат од апсурдните гревови на минатото. Сѐ додека еден преживеан сведок не отпрета некои нови траги кои наведуваат на досието од 1951 при што е ликвидирана група студенти од Струмица, соопшти продукцијата. 

Снимањето ќе почне во втората половина на септември. Филмот се очекува да биде завршен за киноприкажување напролет со премиера на некој од светските филмски фестивали.