Преглед на вестите од светот

Рускиот претседател Владимир Путин изјави дека е подготвен писмено да гарантира дека Русија се откажува од напад врз Европа како дел од дипломатските преговори. Тој рече дека е „лага“ и „целосна бесмислица“ да се тврди дека Русија има намера да ја нападне Европа, оваа изјава ја даде на прес-конференцијата по завршувањето на неговата посета на главниот град на Киргистан, Бишкек.

Путин постојано ги отфрла обвинувањата од германски и други европски политичари дека Русија сака да нападне и други европски земји по Украина. Тој, исто така, ја повтори својата подготвеност за мировни преговори. Следната недела, претставници на САД се очекуваат во Москва на разговори за можен крај на војната што трае повеќе од три и пол години. Се очекува разговорите да опфатат и безбедносни гаранции за Украина и Европа. Како основен предуслов за договор, Путин повторно го спомена повлекувањето на украинските трупи од покраините Доњецк и Луганск, во регионот Донбас, во источна Украина.

Украинскиот претседател Володимир Зеленски во четврток изјави дека украинските и американските делегации треба да се сретнат оваа недела за да изработат формула дискутирана на разговорите во Женева за да се донесе мир и да се обезбедат безбедносни гаранции за Киев.Тој рече дека следната недела ќе има понатамошни разговори во кои ќе учествуваат делегациите и тој самиот, иако не даде детали.

Претседателот Доналд Трамп вообјави дека еден припадник на Националната гарда починал откако беше застрелан во заседа од страна на авганистански државјанин во близина на Белата куќа. Станува збор за 20-годината Сара Бекстром, која подлегна на повредите. Нападот предизвика обвинувања од неговата администрација за неуспеси во проверката на имиграцијата од времето на Бајден и предизвика сеопфатен преглед на случаите за азил.

ФБИ претресе повеќе имоти во рамките на проширената истрага, вклучително и куќа во државата Вашингтон поврзана со осомничениот, идентификуван како 29-годишниот Рахманула Лаканва. Официјалните лица изјавија дека Лаканва бил дел од единица поддржана од ЦИА во Авганистан пред да дојде во САД во 2021 година во рамките на програмата за преселување.

Папата Лео го започна своето прво патување надвор од Италија откако вчера го имаше првиот ден од посетата на Турција. Тој беше пречекан од турскиот претседател Таип Ердоган, а го посети мавзолејот на основачот на модерна Турција, Мустафа Кемал Ататурк. Посетата на Турција е првата етапа од патувањето кое ќе го однесе и првиот американски папа во Либан, каде што се очекува да ги повтори своите повици за крај на војните и луѓето од различно потекло да живеат заедно во хармонија. Папата во Турција ќе претстојува три дена. 

Жителите на Хонг Конг се надеваа дека ќе бидат пронајдени повеќе преживеани, дури и кога противпожарните власти изјавија дека очекуваат да ги завршат операциите за пребарување и спасување откако најлошиот пожар во градот за речиси 80 години во петокот го уништи огромниот станбен комплекс, при што загинаа најмалку 94 лица, а десетици други се водат како исчезнати.

Рано утрово пожарникарите речиси целосно го локализираа пожарот што го уништи станбениот комплекс Ванг Фук Корт во северниот округ Таи По. Населбата од осум кули, во која живеат повеќе од 4.600 луѓе, беше во процес на реновирање и беше завиткана во бамбусови скелиња и зелена мрежа.

Дури 279 лица беа пријавени како исчезнати, но спасувачките служби очекуваат оваа бројка да се зголеми.