Обединетите Арапски Емирати соопштија дека утрово пресретнале ирански ракети и дронови и одговориле на нападот

Американскиот сојузник Обединетите Арапски Емирати соопшти дека нивната противвоздушна одбрана рано утрово одговорила на нови ракетни и беспилотни напади од Иран, што претставува нов тест за кревкото едномесечно примирје меѓу САД и Иран, пренесува Хина.

За најновиот напад врз ОАЕ, кој следуваше еден ден по размената на оган меѓу САД и Иран околу Ормуската Теснина, додека Вашингтон го очекуваше одговорот на Техеран на американскиот предлог за завршување на конфликтот, засега има малку достапни детали. Од почетокот на војната на 28 февруари, Иран често ги напаѓа ОАЕ и другите земји од Персискиот Залив каде што се наоѓаат американски воени бази.

Американскиот претседател Доналд Трамп вчера изјави дека три американски разурнувачи биле нападнати додека минувале низ Ормуската Теснина, поморски премин преку кој поминува околу една петтина од светскиот транспорт на нафта и течен природен гас, а кој Иран речиси целосно го затвори од почетокот на конфликтот.

„Три американски разурнувачи од светска класа успешно излегоа од Ормуската Теснина под оган. На бродовите не им е нанесена штета, но е предизвикана голема штета на иранските напаѓачи“, напиша Трамп на својата мрежа „Трут соушл“ (Truth Social).

Тој подоцна им изјави на новинарите дека примирјето сè уште е во сила и се обиде да го минимизира значењето на размената на оган.

– Денеска си поигруваа со нас. Ние ги уништивме – рече Трамп во Вашингтон.

Врховната здружена воена команда на Иран ги обвини САД за прекршување на примирјето со напад врз ирански танкер и друг брод, како и со воздушни напади врз цивилни подрачја на островот Кешм во Ормуската Теснина и блиските крајбрежни области Бандар Хамир и Сирик на иранското копно. Иранската војска соопшти дека возвратила со напади врз американски воени бродови источно од теснината и јужно од пристаништето Чабахар.

Портпаролот на иранската централна команда „Хатам ал-Анбија“ изјави дека иранските напади предизвикале „значителна штета“, но американската Централна команда тврди дека ниту еден брод не бил погоден. Иранската телевизија „Прес ТВ“ (Press TV) подоцна објави дека по неколкучасовната размена на оган, „ситуацијата на иранските острови и крајбрежни градови долж Ормуската Теснина сега е вратена во нормала“.

Двете страни повремено разменуваат оган откако примирјето стапи во сила на 7 април, а Иран напаѓа цели во земјите од Персискиот Залив, вклучително и ОАЕ. Трамп посочи дека преговорите со Техеран и натаму се движат во позитивна насока и покрај најновите судири.

– Преговараме со Иранците – изјави тој пред новинарите.

Пред најновите напади, САД предложија формален договор за завршување на војната, но во него не беа опфатени клучните американски барања Иран да ја запре својата нуклеарна програма и повторно да ја отвори Ормуската Теснина. Техеран соопшти дека сè уште нема донесено одлука за предлогот. И покрај тоа, Трамп рече дека Иран го прифатил неговото барање земјата никогаш да не поседува нуклеарно оружје, што според него е дел од американскиот предлог.

– Нема никаква шанса за тоа. Тие го знаат тоа и се согласија. Да видиме дали се подготвени да го потпишат – рече Трамп. На прашањето кога би можел да биде постигнат договор, тој одговори: „Можеби нема да се случи, но може да се случи секој ден. Верувам дека тие сакаат договор повеќе од мене“.

Војната претставува тест за односот на Трамп со неговата политичка база во САД, откако претходно се спротивставуваше на американско вмешување во странски војни и ветуваше намалување на цените на горивата. Просечните цени на бензините во САД пораснале за повеќе од 40 проценти од крајот на февруари, посочува Хина.