Самит на Македонија 2025 во Скопје

Во Скопје утрово почна петтиот Самит на Македонија 2025. Над 250 гости ќе проследат дискусии за економскиот напредок на Македонија според мерениот индекс составен од Македонија 2025 во соработка со МекКинзи.

Присутните утрово ги поздравија членовите на Одборот на директори Вера Ставроф, Мајк Зафировски и Живко Мукаетов, а во текот на дводневниот Самит ќе имаат можност да слушнат за најновите светски трендови во бизнисот, инвестициите, финансиите, лидерството, иновации и технологија. 

Ќе се дебатира за одржливоста на енергенсите и можноста да се користат обновливи извори на енергија според примерот на нордиските земји кои планираат 100 проценти да се снабдуваат со одржлива енергија. Ќе се зборува за циркуларната економија, термин кој означува револуција во индустриската економија преку намалување на отпадот и избегнување на загадувањето. Експерт од ЕУ ќе зборува за трансформирање на градовите во паметни градови според примерот на неколку европски центри.

Првпат ќе се претстави програмата на Европската вселенска агенција и можноста приватниот сектор да се вклучи во нивнитге истражувања. Ќе бидат презентирани и најновите светски технолошки достигнувања како емоционално инженерство, теле-здравје и развој на интелигентна комуникација помеѓу машини.

Самитот е на тема Платформа за пренесување знаење од областа на бизнисот, лидерството и иновациите.