Тајланд и Камбоџа разменија оган во близина на спорната граница

Утрово повторно имаше борби долж границата меѓу Тајланд и Камбоџа, каде што долгогодишните тензии ескалираа во едни од најлошите насилства во последните години, принудувајќи над 100.000 луѓе да побегнат.

Тајландската војска предупреди на Фејсбук за тековните судири во повеќе гранични области и ги повика жителите во североисточните провинции да ја избегнуваат областа, пренесе ДПА.

Ова следеше по вчерашните тешки борби, кога тајландските сили соопштија дека извршиле воздушни напади врз камбоџански позиции како одговор на прекуграничен оган. Камбоџа возврати со артилерија, вклучувајќи напади врз цивилни области.

Бројот на загинати во Тајланд се искачи на 14, 13 цивили и еден војник, соопшти тајландската влада. Властите евакуираа 100.000 жители од четири провинции, преместувајќи ги во околу 300 центри за евакуација.

Двете соседни земји од Југоисточна Азија децении наназад се расправаат за делови од нивната граница долга над 800 километри. Конфликтот е центриран околу храмот Прасат Преах Вихеар, локалитет на светското наследство на УНЕСКО што го бараат и двете земји.

Двете страни се обвинуваа меѓусебно за почетокот на најновата рунда борби. Камбоџанскиот премиер Хун Манет вчера го повика Советот за безбедност на ОН итно да се состане во врска со она што тој го опиша како неиспровоциран, намерен и целен напад врз Камбоџа.

Се очекува Советот денеска да се состане за ова прашање.