Тошковски: Ќе одговара секој криминалец во МВР кој наместо да ги штити, ги краде граѓаните

Полицаецот од тимот на обезбедувањето на премиерот не бил случајно фатен како оддава службени тајни тврди министерот. По оперативни сознанија на МВР биле следени тројца припадници на полицијата. Детали кој му ги давал документите со ознака службена тајна и какви информации биле извлечени од институциите, министерот не открива.

Внатрешната контрола во МВР открила многу кртови и незаконски дејствија на полицајци и за сите нив ќе има пријава вели министерот коментирајќи го и случајот со 10 кривични за полицајци кои незаконски црпеле од буџетот средства за патни трошоци.

-Во таа постапка има докази кои што потврдуваат на степен на основи на сомнение дека полициските службеници незаконито наплатувале средства од парите на македонските граѓани, од буџетот на Македонија. Заради тоа е поднесена кривичната постапка која што е поднесена од страна на Одделот за внатрешна контрола како и во сите останати случаи каде што ќе утврдиме дека криминалците во редовите на МВР наместо да ги штитат македонските граѓани, тие ги крадат и за секој еден ќе поднесеме кривична пријава без оглед дали во јавноста има информации дека истиот бил близок со едни, други, трети и четврти.

Прашан дали по истиот принцип може да бидат  санкционирани  пратеници кои земаат пари за патни трошоци а имаат живеалиште во Скопје, Тошковски уверува доколку обезбедат такви  докази ќе постапат без разлика кој на каква функција е во државата.