Преглед на вестите од светот

Вкупно 12 лица се повредени како последица од ударот на бурата „Кирк“ во Франција, којашто оваа недела ја зафати целата земја, пренесоа француските медиуми. Црвеното предупредување или метеоаларм останува на сила во северните француски департмани. Според податоците на електро операторот, поради невремето без струја останале околу 67.000 домови.

Најмалку 30 лица загинаа во израелските напади врз бегалскиот камп Џабалија во северниот дел на Газа, соопшти Агенцијата за цивилна заштита во Газа. Хезболах соопшти дека истрелал неколку проектили врз израелска воена база јужно од Хаифа додека Израелците го прославувале Јом Кипур, најважниот празник во еврејскиот верски календар. Лидерите на деветте медитерански членки на Европската унија повикаа на итно примирје.

Изјавата ја усвоија лидерите на Кипар, Словенија, Португалија, Франција, Шпанија, Италија, Малта, Хрватска и Грција. Францускиот претседател Емануел Макрон повика на итен прекин на огнот во Газа и Либан и на ослободување на израелските заложници кои се држат во палестинската енклава.

Бројот на загинати од ураганот Милтон во петокот се искачи на 17, вклучително и пет загинати од торнада што го погодија  источниот брег на Флорида. Гувернерот на Флорида Рон Де Сантис денеска изјави дека досега најмалку 1.600 луѓе и 140 животни се спасени од ураганот низ американската сојузна држава. Материјалната штета допрва ќе се проценува.